भंडारा पत्रिका / प्रतिनिधी
भंडारा : जिद्द, चिकाटी आणि कठोर मेहनतीच्या जोरावर लहान वयातच उल्लेखनीय कामगिरी करणाऱ्या महर्षी विद्या मंदिरचा विद्यार्थी सूर्यांशू सुभाष बारसे याने जलतरण क्रीडा क्षेत्रात आपली वेगळी ओळख निर्माण केली आहे. अवघ्या १३ वर्षांच्या सूर्यांशूने वैनगंगा नदीत जलतरण करत कारधा ते कोरंभी हे अंतर केवळ १ तास ३५ मिनिटांत पार केले. त्याच्या या उल्लेखनीय कामगिरीमुळे त्याचे सर्व स्तरातून कौतुक होत असून, त्याने भंडारा जिल्ह्याच्या क्रीडा क्षेत्राचा गौरव वाढविला आहे.
लहान वयातच जलतरणाची आवड जोपासणाऱ्या सूर्यांशूने नियमित सराव, मेहनत आणि प्रशिक्षकांच्या मार्गदर्शनातून ही कामगिरी साध्य केली. नदीतील जलतरणासाठी शारीरिक क्षमता, सहनशक्ती, एकाग्रता आणि पाण्याचा अंदाज घेण्याचे कौशल्य महत्त्वाचे असते. अशा आव्हानात्मक परिस्थितीत कारधा ते कोरंभी हे अंतर निर्धारित वेळेत पूर्ण करणे ही त्याच्या सरावाची आणि जिद्दीची साक्ष मानली जात आहे.
सूर्यांशूच्या या यशामागे त्याला मार्गदर्शन करणारे प्रशिक्षक अविनाश निंबार्ते आणि करण शेंडे यांचे महत्त्वपूर्ण योगदान आहे. त्यांच्या मार्गदर्शनाखाली सूर्यांशूने जलतरणाचा सराव करत आपली क्षमता विकसित केली. योग्य प्रशिक्षण आणि सातत्यपूर्ण मेहनतीच्या जोरावर त्याने ही उल्लेखनीय कामगिरी केली आहे.
वयाच्या अवघ्या तेराव्या वर्षी सूर्यांशूने मिळविलेल्या या यशामुळे त्याच्याकडून भविष्यातही उत्तम कामगिरीची अपेक्षा व्यक्त होत आहे. त्याच्या या कामगिरीबद्दल शाळेतील शिक्षक, मित्रपरिवार, क्रीडाप्रेमी आणि नागरिकांकडून अभिनंदन केले जात आहे.
