भंडारा पत्रिका/वार्ताहर गर्रा बघेडा : तुमसर तालुक्यातील सुंदरटोला गावात रविवार, १५ फेब्रुवारी रोजी पहाटे ३ वाजता एका तरुणाने आपल्या घरी दोरीने गळफास घेऊन आत्महत्या केली. मृताचे नाव महेंद्र शामराव इनवते (२६ वर्ष) असे असून तो अविवाहित आहे. तुमसर तहसीलमधील सुंदरटोला येथील रहिवासी आहे. कुटुंबीयांनी दिलेल्या माहितीनुसार, महेंद्र गेल्या चार वर्षांपासून कर्करोग या गंभीर आजाराने ग्रस्त होता. त्याच्यावर उपचार सुरू होते, परंतु त्याला आराम मिळत नसल्याने आणि असह्य वेदनांमुळे तो मानसिकदृष्ट्या अस्वस्थ झाला. या त्रासाला कंटाळून त्याने गळफास घेऊन आत्महत्या केली. घटनेची माहिती मिळताच गोबरवाही पोलीस घटनास्थळी पोहोचले. पोलिसांनी पंचनामा तयार केला आणि मृतदेह शवविच्छेदनासाठी तुमसर सरकारी रुग्णालयात पाठवला. मृताच्या कुटुंबात वडील आणि भाऊ आहेत. या दु:खद घटनेने कुटुंबावर दु:खाचा डोंगर कोसळला आहे. पोलीस निरीक्षक शरद शेवाळे यांच्या नेतृत्वाखाली पुढील तपास सुरू आहे.
