भंडारा पत्रिका/प्रतिनिधी लाखांदूर : कठोर परिश्रम, जिद्द आणि केवळ आत्मअभ्यासाच्या जोरावर भंडारा जिल्ह्यातील लाखांदूर सारख्या ग्रामीण भागातील विद्यार्थिनीने देशपातळीवर आपल्या यशाचा डंका वाजवला आहे. लाखांदूर येथील सृष्टी कमलेश बहादुरे हिची भारतातील अत्यंत प्रतिष्ठित आणि एकमेव अशा ‘इंडियन इन्स्टिट्यूट फॉर ह्युमन सेटलमेंट्स’ (IIHS ), बंगलोर येथे रिसर्च डिग्रीसाठी निवड झाली आहे. या वर्षी नागपूर विभागातून निवड झालेल्या मोजक्या विद्यार्थ्यांमध्ये सृष्टीने आपले स्थान पटकावले आहे.
IIHS ‘ बंगलोर ही देशातील अशा प्रकारची एकमेव नामांकित युनिव्हर्सिटी मानली जाते. येथे प्रवेश मिळवणे हे कोणत्याही विद्याथ्यार्साठी एक मोठे स्वप्न असते. यंदाच्या शैक्षणिक वर्षात संपूर्ण नागपूर विभागातून केवळ ९ मुली आणि २ मुलांचीच या संस्थेत निवड झाली असून, त्यात सृष्टीचा समावेश आहे. या संस्थेची प्रवेश प्रक्रिया अत्यंत कठीण आणि आव्हानात्मक असते.अखिल भारतीय प्रवेश परीक्षा या पहिल्या टप्प्यात देशपातळीवरील अत्यंत काठिण्यपातळी असलेली परीक्षा उत्तीर्ण करावी लागते. परीक्षा उत्तीर्ण झाल्यावर तज्ज्ञ समितीद्वारे उमेदवाराची सखोल आणि किचकट मुलाखत घेतली जाते, जिथे विद्यार्थ्याच्या बौद्धिक क्षमतेची परीक्षा होते. अंतिम टप्प्यात सर्व शैक्षणिक व वैयक्तिक कागदपत्रांची कडक तपासणी केली जाते. या सर्व खडतर टप्प्यांवर यशस्वी मात केल्यानंतर सृष्टीला या नामांकित संस्थेत रिसर्च डिग्रीसाठी प्रवेश मिळाला आहे. विशेष म्हणजे, या संशोधनासाठी तिला संस्थेकडून प्रतिष्ठित स्कॉलरशिप (शिष्यवृत्ती) देखील मंजूर झाली आहे.
ग्रामीण भागातून यशाचे शिखर: कोणतीही शिकवणी नाही! सृष्टीचे हे यश यासाठी अधिक कौतुकास्पद आहे, कारण तिने कोणत्याही महागड्या कोचिंग क्लास किंवा शिकवणीचा आधार न घेता, केवळ ‘सेल्फ स्टडी’ (आत्मअभ्यास) करून हे यश संपादन केले आहे. नागपूरच्या कमला नेहरू कॉलेजमधून गणित विषयात बी.एस्सी. आणि त्यानंतर एम.सी.ए. पूर्ण केल्यानंतर तिने रिसर्च क्षेत्राकडे पाऊल टाकले. ग्रामीण पार्श्वभूमी असूनही, योग्य नियोजन आणि अभ्यासातील सातत्याच्या जोरावर तिने हा टप्पा गाठला. सृष्टीच्या या यशाबद्दल लाखांदूर परिसरासह संपूर्ण भंडारा आणि नागपूर जिल्ह्यात तिचे भरभरून कौतुक होत आहे. तिच्या या यशामुळे ग्रामीण भागातील इतर विद्यार्थ्यांनाही उच्च शिक्षणासाठी आणि संशोधनासाठी नवी प्रेरणा मिळाली आहे. एका सर्वसामान्य कुटुंबातील मुलीने देशपातळीवरील संस्थेत मिळवलेले हे स्थान विदर्भाच्या शैक्षणिक क्षेत्रात अभिमानास्पद मानले जात आहे. “केवळ मोठ्या शहरात जाऊन किंवा महागडे क्लासेस लावूनच यश मिळते असे नाही, तर योग्य दिशा आणि स्वत:वर विश्वास ठेवून केलेला अभ्यास तुम्हाला कोणत्याही शिखरावर पोहोचवू शकतो, हे सृष्टीने सिद्ध करून दाखवले आहे.”
