जेएसवाय फॉर्मवर सही नाकारल्याचा दावा; वरिष्ठ अधिकाऱ्यांकडून निष्पक्ष चौकशीची मागणी
रामेश्वर रहांगडाले/भंडारा पत्रिका
गर्रा-बघेडा : गर्भवती मातांना आरोग्यसेवा मिळवून देण्यासाठी अहोरात्र कार्यरत असलेल्या आशा वर्करशी तुमसर उपजिल्हा रुग्णालयात अपमानास्पद वर्तन केल्याचा गंभीर आरोप करण्यात आला आहे. गणेशपूर येथील आशा वर्कर प्रतिमा पिलगर यांनी १३ ऑक्टोबर २०२६ रोजी दोन गर्भवती मातांना प्रसूतीसाठी दाखल केले होते. यावळी जननी सुरक्षा योजना (जेएसवाय) फॉर्मवर सही मागितल्यानंतर ड्युटीवरील परिचारिकेने सही देण्यास नकार दिला आणि अपमानास्पद भाषा वापरून धमकावल्याचा दावा त्यांनी केला आहे. या प्रकरणाची वरिष्ठ अधिकाऱ्यांनी निष्पक्ष चौकशी करावी, अशी मागणी होत आहे.
जेएसवाय फॉर्मवर सही नाकारल्याचा आरोप
आशा वर्कर प्रतिमा पिलगर यांच्या सांगण्यानुसार, १३ ऑक्टोबर रोजी दुपारी सुमारे १२ वाजताच्या दरम्यान त्यांनी गणेशपूर येथील दोन गर्भवती मातांना प्रसूतीसाठी तुमसर उपजिल्हा रुग्णालयात दाखल केले. त्यानंतर जननी सुरक्षा योजनेच्या (जेएसवाय) फॉर्मवर संबंधित परिचारिकेची सही घेण्याचा प्रयत्न केला असता, सही देण्यास नकार देण्यात आल्याचा आरोप त्यांनी केला आहे.
तसेच, ‘माझ्याविरोधात खोटी तक्रार करत असतेस. जास्त केसलेस तर तुझी पोलिस तक्रार करेन,’ अशा शब्दांत आपल्याला धमकावण्यात आल्याचा दावा प्रतिमा पिलगर यांनी केला आहे. या आरोपांची अधिकृत पुष्टी अद्याप झालेली नसून, संबंधित रुग्णालय प्रशासनाची बाजू समोर येणे आवश्यक आहे.
३० किलोमीटरच्या अंतरावरून वारंवार चक्री का?
गणेशपूर ते तुमसर हे अंतर सुमारे ३० किलोमीटर असल्याचे सांगितले जाते. अशा परिस्थितीत केवळ एका सहीसाठी आशा वर्करला वारंवार रुग्णालयात चकऱ्या माराव्या लागत असतील, तर ही बाब गंभीर असून त्यामागील कारणांची चौकशी करण्याची गरज व्यक्त होत आहे. शासकीय योजनांशी संबंधित कागदपत्रांची प्रक्रिया सुलभ आणि वेळेत पूर्ण व्हावी, अशी अपेक्षा आहे.
सीबीसी रक्ततपासणीसाठी शुल्क आकारल्याचाही आरोप
या प्रकरणासोबतच गर्भवती मातांच्या सीबीसी (CBC) रक्ततपासणीबाबतही प्रतिमा पिलगर यांनी प्रश्न उपस्थित केला आहे. त्यांच्या आरोपानुसार, रक्ततपासणीसाठी बाहेरील खासगी प्रयोगशाळेतील कर्मचाऱ्यांना बोलावले जाते आणि संबंधित तपासणीसाठी सुमारे २५० रुपये आकारले जातात.
या आरोपांची सत्यता तपासण्यासाठी रुग्णालयातील सीबीसी तपासणीची व्यवस्था, रुग्णांकडून आकारले जाणारे शुल्क तसेच मागील दोन ते तीन महिन्यांतील तपासणी अहवाल आणि संबंधित नोंदींची चौकशी करावी, अशी मागणी करण्यात येत आहे. या व्यवस्थाबाबत रुग्णालय प्रशासनाचे अधिकृत स्पष्टीकरण मिळणे महत्त्वाचे ठरणार आहे.
वरिष्ठ अधिकाऱ्यांनी दखल घेण्याची मागणी
या प्रकरणासंदर्भात प्रतिमा पिलगर यांनी दुपारी सुमारे दीड ते दोन वाजताच्या दरम्यान तालुका स्तरावरील अधिकाऱ्यांशी दूरध्वनीवर संपर्क साधल्याचे सांगितले. तसेच संबंधित पर्यवेक्षकाशीही संपर्क साधण्यात आल्याचे त्यांनी नमूद केले.
आशा वर्कर ग्रामीण भागातील गर्भवती माता आणि इतर रुग्णांना आरोग्यसेवा मिळवून देण्यासाठी महत्त्वाची भूमिका बजावतात. त्यामुळे त्यांच्याशी गैरवर्तन झाल्याच्या आरोपांकडे गंभीरतेने घेऊन वरिष्ठ आरोग्य अधिकाऱ्यांनी या प्रकरणाची निष्पक्ष चौकशी करावी, अशी मागणी होत आहे.
चौकशीत आरोप सिद्ध झाल्यास संबंधित अधिकारी किंवा कर्मचाऱ्यांवर नियमानुसार कारवाई करावी, तसेच जेएसवाय फॉर्मवरील सही नाकारण्याचे कारण आणि सीबीसी तपासणीसाठी शुल्क आकारण्याच्या प्रकरणाची वस्तुस्थिती स्पष्ट करावी, अशी मागणी करण्यात येत आहे.
आशा वर्कर प्रतिमा पिलगर यांच्या तक्रारीची दखल घेऊन त्यांना न्याय मिळणार का? या प्रकरणावर तुमसर उपजिल्हा रुग्णालय प्रशासन आणि वरिष्ठ आरोग्य अधिकारी काय भूमिका घेतात, याकडे नागरिकांचे लक्ष लागले आहे.
